(ဋ)- ဦးစိုင်းအောင်ညွန့်(မိုင်းရယ်မဲဆန္ဒနယ်)
(ဋ)- ဦးစိုင်းအောင်ညွန့်(မိုင်းရယ်မဲဆန္ဒနယ်)
မိုင်းရယ်မြို့နယ်၊ မန်ပုံရွာမှ နမ့်လောင်းတံတားလမ်းကို ၁၈ ပေအကျယ် ကတ္တရာလမ်းအဖြစ် ဆောင်ရွက်ပေးရန် အစီအစဉ်ရှိ မရှိသိရှိလိုခြင်းနှင့်စပ်လျဉ်းသည့်မေးခွန်း
မိုင်းရယ်မြို့နယ်သည် ရှမ်းပြည်နယ်(မြောက်ပိုင်း)၊ လားရှိုးမြို့နှင့် ရှမ်းပြည်နယ်(တောင်ပိုင်း)၊ တောင်ကြီးမြို့ကို ဆက်သွယ်ထားသည့်လမ်းပေါ်တွင် တည်ရှိသော မြို့တစ်မြို့ဖြစ်ပါကြောင်း၊ မိုင်းရယ်မြို့နယ်မှ ရှမ်းပြည်နယ်(တောင်ပိုင်း) နယ်စပ် နမ့်လောင်းတံတားအထိ ၁၈ ပေအကျယ် ကတ္တရာလမ်း ၇ မိုင်၊ ၄ ဖာလုံခင်းထားပြီးဖြစ်ပါကြောင်း၊ ၁၂ ပေအကျယ် ကျောက်ချောလမ်း ၁၅ မိုင်၊ ၄ ဖာလုံ ဖြစ်၍ စုစုပေါင်း ၂၃ မိုင်ရှိပါကြောင်း၊ ၁၅ မိုင်၊ ၄ ဖာလုံ ၁၂ ပေအကျယ် ကျောက်ချော လမ်းပိုင်းများဖြစ်သည့် မန်ပုံရွာမှ မန်ဖျက်ရွာ နမ့်လောင်းတံတားအထိ နေ့စဉ်ကားအစီးရေများစွာ ဖြတ်သန်းသွားလာနေကြပြီး လမ်းကျဉ်းမြောင်းခြင်း၊ ကတ္တရာလမ်းများ ပေါက်ပြဲပျက်စီးနေခြင်း ကြောင့် ပြည်သူအများ သွားလာရခက်ခဲပြီး ခရီးနှောင့်နှေးကြန့်ကြာမှုများ ဖြစ်ပေါ်လျက် ရှိပါကြောင်း။
ယခုတင်ပြမည့်လမ်းမကြီးသည် ၁၀၂၇ အမည်ခံ တိုက်ပွဲဖော်ဆောင်မှုကြောင့် ယာယီကုန်စည် သယ်ယူပို့ဆောင်မှု ပြတ်တောက်သွားသည့် မန္တလေး-လားရှိုး-မူဆယ်လမ်းအစား ရှမ်းပြည်(မြောက်)၊ ရှမ်းပြည်(တောင်)၊ ရှမ်းပြည်(အရှေ့)နှင့် ပြည်မကြီးကို ဆက်သွယ်ပေးထားသည့် ပြည်ထောင်စု လမ်းမကြီးတစ်ခုလည်းဖြစ်ပါကြောင်း၊ နယ်မြေလုံခြုံမှုရှိပြီး လမ်းပန်းဆက်သွယ်ရေးအဓိကကျမှုနှင့် ဒေသခံပြည်သူတို့မှလည်း ထိုလမ်းမကြီးကို အမြန်ခင်းပေးစေချင်သည့် သဘောဆန္ဒများ ရှိနေပါကြောင်း၊ သို့ဖြစ်ပါ၍ ၁၅ မိုင်၊ ၄ ဖာလုံခန့် ရှည်လျားသည့် မိုင်းရယ်မြို့နယ်၊ မန်ပုံရွာမှ နမ့်လောင်းတံတားအထိ ၁၂ ပေအကျယ်ကျောက်ချောလမ်းကို ၁၈ ပေ အကျယ်ကတ္တရာလမ်းအဖြစ် အနီးစပ်ဆုံး မည်သည့်ဘဏ္ဍာရေးနှစ်များအတွင်း လျာထားဆောင်ရွက်ပေးသွားမည်ကို သိရှိလိုကြောင်း မေးမြန်းခဲ့ပါသည်။
ဆောက်လုပ်ရေးဝန်ကြီးဌာန၊ ဒုတိယဝန်ကြီး ဦးမျိုးမြင့် က
မေးခွန်းပါလမ်းပိုင်းသည် ရှမ်းပြည်နယ်(မြောက်ပိုင်း)နှင့် ရှမ်းပြည်နယ် (တောင်ပိုင်း)ကို ဆက်သွယ်ထားသော လားရှိုး(မယ်ဟန်)-မိုင်းရယ်-ကျေးသီးလမ်း၏ လမ်းပိုင်းဖြစ်ပြီး ရှမ်းပြည်နယ် (မြောက်ပိုင်း)တွင် ၇၁ မိုင် အရှည်ရှိပြီး ရှမ်းပြည်နယ်အစိုးရအဖွဲ့မှ စီမံခန့်ခွဲသောလမ်း ဖြစ်ပါကြောင်း၊ အဆိုပါလမ်းအပိုင်းသည် မန်ပုံရွာအနီး မိုင်တိုင် ၅၅ မိုင်၊ ၄ ဖာလုံမှ နမ့်လောင်းတံတား မိုင်တိုင် ၇၁ မိုင်၊ ၀ ဖာလုံအထိ ၁၅ မိုင်၊ ၄ ဖာလုံအရှည်ရှိပြီး လက်ရှိလမ်းအခြေအနေ ၁၂ ပေအကျယ် ကတ္တရာလမ်း ၁၀ မိုင်၊ ၅ ဖာလုံနှင့် ၁၂ ပေအကျယ် ကျောက်ခင်းလမ်း ၄ မိုင်၊ ၇ ဖာလုံ ဖြစ်ပါကြောင်း။
ရှမ်းပြည်နယ်(မြောက်ပိုင်း)အတွင်းတွင် လမ်းမိုင်ပေါင်း ၄,၃၅၅ မိုင်၊ ၄ ဖာလုံရှိပြီး လက်ရှိ အခြေအနေသည် ကတ္တရာကွန်ကရစ်(AC)လမ်း ၅၃၂ မိုင်၊ ၂ ဖာလုံ၊ ကွန်ကရစ်လမ်း ၃၃ မိုင်၊ ၆ ဖာလုံ၊ ကတ္တရာလမ်း ၁,၆၃၉ မိုင်၊ ၇ ဖာလုံ၊ ကျောက်ခင်းလမ်း ၂၉၇ မိုင်၊ ၇ ဖာလုံ၊ အမာခံလမ်း ၄၁၅ မိုင်၊ ၁ ဖာလုံနှင့် မြေသားလမ်း ၁,၄၃၆ မိုင်၊ ၅ ဖာလုံဖြစ်ပါကြောင်း၊ အဆိုပါလမ်းပိုင်းတွင် ၂၀၂၆-၂၀၂၇ ဘဏ္ဍာရေးနှစ်၊ ရှမ်းပြည်နယ် အစိုးရအဖွဲ့၏ ရန်ပုံငွေဖြင့် အောက်ပါလုပ်ငန်းများ ခွင့်ပြုထားပါ ကြောင်း -
(က) ၁၂ ပေအကျယ်မှ ၁၈ ပေအကျယ် ကတ္တရာလမ်းချဲ့ခြင်း ၁ မိုင်နှင့် ၆ ဖာလုံ၊
(ခ) မူလ ကျောက်ခင်းလမ်းအား ၁၂ ပေအကျယ် ကတ္တရာလမ်းသစ်ခင်းခြင်း ၂ ဖာလုံ ဆောင်ရွက်သွားမည်ဖြစ်ပါကြောင်း။
အဆိုပါလမ်း၏ ၁၂ပေအကျယ်မှ ၁၈ပေအကျယ် ကတ္တရာလမ်းချဲ့ခင်းရန် ကျန်ရှိသည့် ၁၃ မိုင်၊ ၆ ဖာလုံအား ၂၀၂၇-၂၀၂၈ ဘဏ္ဍာရေးနှစ်မှ စတင်၍ ရှမ်းပြည်နယ်အစိုးရအဖွဲ့၏ ရန်ပုံငွေတွင် လျာထား ပေးသွားမည်ဖြစ်ပြီး ရှမ်းပြည်နယ်အစိုးရအဖွဲ့မှ ပေးပို့သော အချက်အလက်များနှင့်ပေါင်းစပ်၍ ပြန်လည်ဖြေကြားခဲ့ပါသည်။