(စ)-ဦးနိုင်ဝင်း(ဓနုဖြူမဲဆန္ဒနယ်)-မေးခွန်း
ဦးနိုင်ဝင်း(ဓနုဖြူမဲဆန္ဒနယ်)
ဓနုဖြူမြို့နယ်ရှိ ဆကာကြီးကျေးရွာမှ သဲဖြူကျေးရွာ မဲဇလီတံတားထိပ်ထိ ကွန်ကရစ်လမ်းပိုင်း အားအဆင့်မြှင့်တင်ပေးနိုင်ခြင်း အစီအစဉ်ရှိ မရှိသိရှိလိုခြင်းနှင့်စပ်လျဉ်းသည့်မေးခွန်း
ဧရာဝတီတိုင်းဒေသကြီး၊ ဓနုဖြူမြို့နယ် ဧရာဝတီမြစ်ကြီး၏ အရှေ့ဘက်အခြမ်း၊ ဆကာကြီးကျေးရွာနှင့် ရန်ကုန်တိုင်းဒေသကြီး၊ တိုက်ကြီးမြို့နယ် အဖျောက်မြို့ တို့ကို ကွန်ကရစ် လမ်းဖြင့် ဆက်သွယ်သွားလာခဲ့ရာ ၁၆ နှစ်ခန့်ရှိပြီဖြစ်ပါကြောင်း၊ ဆကာကြီး ကျေးရွာနှင့် အဖျောက်မြို့တို့သည့်၇ မိုင်၊ ၃ ဖာလုံသာကွာဝေးပါကြောင်း၊ အဖျောက်မြို့မှတစ်ဆင့် တိုက်ကြီး မြို့နယ်၊ တိုက်ကြီးမြို့မှတစ်ဆင့် ရန်ကုန်တိုင်းဒေသကြီးသို့ ဒေသခံပြည်သူများသည် ဒေသ ထွက်ကုန် ပစ္စည်းများ ရောင်းဝယ်ဖောက်ကားခြင်း၊ ကျန်းမာရေးစောင့်ရှောက်မှုခံယူခြင်း၊ ဒေသတွင်း သို့ လူသုံး အိမ်သုံးကုန်စည်များ၊ ဆောက်လုပ်ရေးပစ္စည်းများ သယ်ယူပို့ဆောင်ရာမှာ ယခင်နှစ်များက များစွာအဆင်ပြေချောမွေ့ခဲ့ပါကြောင်း။
ယခုအခါ အဆိုပါတိုင်းဒေသကြီးနှစ်ခုဆက်သွယ်သည့် ကွန်ကရစ်လမ်းပိုင်း ၃ မိုင်ခန့် ပျက်စီးနေပါကြောင်း၊ ရန်ကုန်တိုင်းဒေသကြီးဘက်ကလမ်းပိုင်းက ကောင်းမွန်ချောမွေ့နေသော် လည်း ဧရာဝတီတိုင်းဒေသကြီးဘက်ကလမ်းပိုင်းသည် ၃မိုင်ခန့်ပျက်စီးယိုယွင်းနေပါကြောင်း၊ လက်ရှိအခြေအနေအရ ဓနုဖြူမြို့နယ် ဆကာကြီး တိုက်နယ်ရှိ ကျေးရွာ ၁၂ အုပ်စု၊ ရွာခွဲပေါင်း ၇၀ ရွာ၊ လူဦးရေ ၁၈၄၃၀ ယောက်တို့၏ မျှော်လင့်ချက် ဆန္ဒသည် ၎င်းဆကာကြီး-အဖျောက်လမ်းအပိုင်း ကောင်းမွန်ရေးသည် ပထမ၊ ဆကာကြီး-အဖျောက် လမ်းပိုင်းကောင်းမွန်ရေး သည် ပဓာန၊ ဆကာကြီး အဖျောက်လမ်းကောင်းမွန်ရေးသည် အဓိက ဖြစ်နေကြောင်း ကွင်းဆင်း သည့်အခါ သိရှိလာခဲ့ရပါကြောင်း၊ သို့ဖြစ်ပါ၍ ဓနုဖြူမြို့နယ်ရှိ ဆကာကြီးကျေးရွာမှ သဲဖြူ ကျေးရွာ မဲဇလီ တံတားထိပ် အထိ ကျန်ရှိနေသည့် အရှည် ၃ မိုင်ကွန်ကရစ်အား အဆင့်မြှင့်တင် ဆောင်ရွက်ပေး မည့် အစီအစဉ်ကို သိရှိလိုပါကြောင်း ဖြင့်မေးမြန်းပါသည်။
သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ဒုတိယဝန်ကြီး၊ ဦးသိုက်စိုး က
ဓနုဖြူမြို့နယ်၊ ဆကာကြီးကျေးရွာ၊ သဲဖြူကျေးရွာမှနေပြီး မဲဇလီတံတားထိ လမ်းပိုင်း သည် တိုင်းဒေသကြီးမှ စီမံခန့်ခွဲသည့် ကျေးလက်ဒေသဖွံ့ဖြိုးရေးဦးစီးဌာနပိုင် Class B အဆင့်ရှိသည့်လမ်းဖြစ်ပါကြောင်း၊ ဧရာဝတီတိုင်းဒေသကြီး၊ ဆကာကြီးမြို့နှင့် ရန်ကုန်တိုင်းဒေသကြီး၊ အဖျောက်မြို့ကို တိုက်ရိုက်ဆက်သွယ်ထားသည့် တိုင်းချင်းဆက် ဆက်သွယ်သည့် ကျေးရွာချင်း ဆက်လမ်း လည်း ဖြစ်ပါကြောင်း။
၂၀၁၆-၁၇ ဘဏ္ဍာနှစ်ကုန်ထိ ကျေးလက်ဒေသဖွံ့ဖြိုးရေးဦးစီးဌာနမှနေပြီး လမ်း အရှည် ၄ မိုင်ကို ကွန်ကရစ်လမ်းအဖြစ် ဆောင်ရွက်ပေးခဲ့ရာ ယခုအခါမှာဆိုလျှင် နှစ်ကာလကြာမြင့်သည့် အတွက်ကြောင့် ပျက်စီးမှုများ ဖြစ်ပေါ်လျက်ရှိပါကြောင်း၊ ဆကာကြီးကျေးရွာမှ နေပြီး မဲဇလီ တံတားထိပ်ထိ ၄ မိုင်တွင် ဆကာကြီးကနေပြီး အင်းတာကလေးလမ်းပိုင်း ၁ မိုင်သာ ကောင်းပြီး ကျန်လမ်းပိုင်း ၃ မိုင်ပျက်စီးလျက်ရှိပါကြောင်း၊ အင်းတာကလေးမှ အင်းတာကြီး ကွန်ကရစ် လမ်းခင်းခြင်း ၂ ဖာလုံကို ၂၀၂၆-၂၇ ဘဏ္ဍာနှစ်တွင် တိုင်းဒေသကြီး ငွေလုံးငွေရင်း ရန်ပုံငွေဖြင့် ဆောင်ရွက်သွားမည်ဖြစ်ပြီး ကျန်လမ်းပိုင်းဖြစ်သည့် ၂ မိုင်၊ ၆ ဖာလုံကို သွားလာမှု အဆင်ပြေ စေရန်အတွက် လမ်းအပိုင်းလိုက်သဲကျောက်ခင်းခြင်းကို ဆောင်ရွက်မည်ဆိုပါက ခန့်မှန်းငွေကျပ် ၆၉ သန်း ကုန်ကျမည်ဖြစ်ပါကြောင်း၊ ၂၀၂၆-၂၇ ဘဏ္ဍာနှစ် ပြင်ဆင်ထိန်းသိမ်း ခြင်း ရန်ပုံငွေ အကန့်အသတ်ဘောင် အတွင်းမှလည်းကောင်း၊ ထပ်မံလိုအပ်ပါက ကျန်လမ်းပိုင်း များကို ၂၀၂၇-၂၈ ဘဏ္ဍာနှစ် တွင် ပြင်ဆင်ထိန်းသိမ်းခြင်းလုပ်ငန်းမှလည်းကောင်း ဆက်လက် ဆောင်ရွက်ပေး သွားမည်ဖြစ်ကြောင်း ပြန်လည်ဖြေကြားခဲ့ပါသည်။