(ခ)- စိုင်းကျော်လှ(ကွန်ဟိန်းမဲဆန္ဒနယ်) မေးခွန်း

(ခ)- စိုင်းကျော်လှ(ကွန်ဟိန်းမဲဆန္ဒနယ်)

ရှမ်းပြည်နယ်၊ ကွန်ဟိန်းမြို့မှ ကာလိမြို့သို့ ဆက်သွယ်ထားသည့် ပြည်ထောင်စုလမ်းမကြီးအား ၂၃ပေအကျယ်ချဲ့ပြီး နိုင်လွန်ကတ္တရာလမ်းအဖြစ် အဆင့်မြှင့်ပေးပါရန် အစီအစဉ်ရှိမရှိ သိရှိလိုခြင်းနှင့်စပ်လျဉ်းသည့်မေးခွန်း

ရှမ်းပြည်နယ်တောင်ပိုင်း၊ ကွန်ဟိန်းမြို့နယ်နှင့် ကာလိမြို့ တို့၏ မြို့ချင်းဆက်သွယ်လမ်းကို ကြယ်ပွင့်ပြမေးခွန်းအဖြစ် မေးမြန်းရခြင်းဖြစ်ပါကြောင်း၊ ကွန်ဟိန်းမြို့နှင့်ကာလိမြို့တို့သည် တောင်ကြီး- ကျိုင်းတုံသွား  ပြည်ထောင်စုလမ်းမကြီးပေါ်တွင် တည်ရှိပါကြောင်း၊ မြို့နှစ်မြို့မှာ ၈ မိုင် ၅ ဖာလုံခန့်ကွာဝေးပါကြောင်း၊  တောင်ကြီး- ကျိုင်းတုံ- တာချီလိတ်လမ်းသည် ထိုင်းနိုင်ငံ၊ တရုတ်နိုင်ငံနှင့် မြန်မာနိုင်ငံတို့၏ကုန်စည်စီးဆင်းရာ ပြည်ထောင်စု လမ်းမကြီးဖြစ်သောကြောင့် ကုန်တင်ကားကြီးများ နေ့ညမရွေး ဦးဒဟိုသွားလာနေသည့် လမ်းမကြီးဖြစ်ပါကြောင်း၊ ကွန်ဟိန်း -ကာလိမြို့ချင်းဆက်လမ်းမှာ ကွေ့ကောက်ပြီး လမ်းကျဉ်းသောကြောင့် ယာဉ်တိုက်မှု များ မကြာခဏဖြစ်ပေါ်လေ့ရှိပါကြောင်း၊  သို့ဖြစ်ပါ၍၎င်းမြို့ချင်းဆက် လမ်းပိုင်းအား ၂၃ ပေအကျယ် နိုင်လွန်ကတ္တရာလမ်းအဖြစ်သို့ အဆင့်မြင့်တင်ပေးပါရန် အစီအစဉ်ရှိ မရှိ အစီအစဉ် ရှိပါက မည်သည့်ဘဏ္ဍာရေးနှစ်တွင် ဆောင်ရွက်ပေးနိုင်မည်ကို မေးမြန်းခဲ့ပါသည်။ 

ဆောက်လုပ်ရေးဝန်ကြီးဌာန ၊ ဒုတိယဝန်ကြီး၊ ဦးမျိုးမြင့်

      မိမိအနေဖြင့် ရှမ်းပြည်နယ်၊ ကွန်ဟိန်းမဲဆန္ဒနယ် ပြည်သူ့လွှတ်တော် ကိုယ်စားလှယ် ဦးစိုင်းကျော်လှမှ မေးမြန်းထားသည့် ရှမ်းပြည်နယ်၊ကွန်ဟိန်းမြို့မှ ကာလိမြို့သို့ ဆက်သွယ်ထား သော ပြည်ထောင်စုလမ်းမကြီးသည် လမ်းကျဉ်းပြီး ကားများ တစ်စီးနှင့် တစ်စီး အသွား အလာအခက်အခဲရှိနေသဖြင့်၂၃ပေအကျယ်ချဲ့ပြီး နိုင်လွန်ကတ္တရာလမ်းအဖြစ် အဆင့်မြှင့် ပေးရန် အစီအစဉ်ရှိ မရှိ သိရှိလိုခြင်းနှင့်စပ်လျဉ်း၍ ဖြေကြားသွားမည်ဖြစ်ပါကြောင်း၊ 

ရှမ်းပြည်နယ်ရှိ တင်ပြထားသည့်လမ်းနေရာမှာ အားလုံးအရှည် ၈ မိုင်နှင့် ၅ ဖာလုံခန့် ရှိပါကြောင်း၊ မြန်မာတစ်နိုင်ငံလုံးရှိ  ဆောက်လုပ်ရေးဝန်ကြီးဌာနမှထိန်းသိမ်းပေးထားသည့် လမ်းများ သည် ၄၁,၁၃၇ မိုင်ရှိပါကြောင်း၊ မိမိတို့တိုင်းပြည်တွင် ပြည်ထောင်စုမှ စီမံခန့်ခွဲသည့် လမ်းရယ်၊တိုင်းဒေသကြီးမှ စီမံခန့်ခွဲသည့် လမ်းဟူ၍  ၂မျိုးရှိပါကြောင်း၊ မိမိတို့ပြည်ထောင်စု  မှစီမံခန့်ခွဲသည့်လမ်းသည် ၁၂,၀၇၂ မိုင်ရှိပါကြောင်း၊ ထိုရှမ်းပြည်နယ်အတွင်းတွင်မိမိတို့ပြည်ထောင်စုမှ စီမံခန့်ခွဲသည့်လမ်းသည် ၂၀၂၆ မိုင် ရှိပါကြောင်း ၊ လွှတ်တော်ကိုယ်စားလှယ်ကြီး မေးမြန်းထားသည့် လမ်းပိုင်းမှာ ရှမ်းပြည်နယ်၊ ကွန်ဟိန်းမြို့မှ ကာလိမြို့သို့ဆက်သွယ်ထားသည့် တောင်ကြီး-ကျိုင်းတုံ-တာချီလိတ်လမ်းမကြီး၏ အစိတ်အပိုင်းဖြစ်ပြီးမိမိတို့ပြည်ထောင်စုမှ စီမံခန့်ခွဲသည့်လမ်းဖြစ်ပါကြောင်း၊ ကွန်ဟိန်းမြို့ ၂၅၅ မိုင် ၃ ဖာလုံမှ ကာလိမြို့ ၂၆၄ မိုင်အထိ ၈ မိုင် ၅ ဖာလုံ ရှည်လျားပြီး လက်ရှိအခြေအနေတွင် ၁၈ ပေ လမ်းဖြစ်ပါကြောင်း၊ ကွန်ဟိန်းမှ ကာလိသို့ ဆက်သွယ်ထားသည့် လမ်းပိုင်းမှာယခုနှစ်ရရှိရန်ပုံငွေ အရ သွားရလာရခက်ခဲပြီး လမ်းပျက်နေသည့် နေရာများတွင် လမ်းပြုပြင်ခြင်းလုပ်ငန်းသာ ဆောင်ရွက်နိုင်ပါကြောင်း၊ မိမိတို့ကကွန်ဟိန်းနှင့် ကာလိလမ်းကို ၈ မိုင် ၅ ဖာလုံအား တိုးလာမည့် ယာဉ်စီးရေနှင့် လိုက်လျော ညီထွေဖြစ်စေမည့် လမ်းအကျယ်ရရှိအောင် စီမံချက်ရေးဆွဲထားပါကြောင်း၊ 

လွှတ်တော်ကိုယ်စားလှယ်ကြီးများ သိရှိပြီးသည့်အတိုင်း မိမိတို့၏ တင်ပြချက်အပေါ်တွင် လွှတ်တော်ကိုယ်စားလှယ်များဖြင့် စနစ်တကျ ဖွဲ့စည်းထားသော အဖွဲ့အစည်းများက ရန်ပုံငွေများကို အသေးစိတ် ထပ်မံစိစစ်လျက်ရှိကြောင်း။ ထိုသို့ စိစစ်မှုများ ပြုလုပ်ပြီးနောက် ရရှိလာသည့် စိစစ်ချက်ရလဒ်များနှင့် ရန်ပုံငွေအခြေအနေများအပေါ် မူတည်၍ လိုအပ်သည့် လုပ်ငန်းစဉ်များကို ဆက်လက်အကောင်အထည်ဖော် ဆောင်ရွက်ပေးသွားမည်ဖြစ်ကြောင်း ပြန်လည်ဖြေကြားခဲ့ပါသည်။