Skip to main content

ဒုတိယအကြိမ် ပြည်သူ့လွှတ်တော် ဆဋ္ဌမပုံမှန်အစည်းအဝေး ပထမနေ့တွင် ပြည်သူ့လွှတ်တော်ဥက္ကဋ္ဌ ပြောကြားသည့် ကြိုဆိုနှုတ်ခွန်းဆက်အမှာစကား

ပြည်သူ့လွှတ်တော်ကိုယ်စားလှယ်များခင်ဗျား-

 ဒုတိယအကြိမ် ပြည်သူ့လွှတ်တော် ဆဋ္ဌမပုံမှန်အစည်းအဝေးကို တက်ရောက်လာကြတဲ့ လွှတ်တော် ကိုယ်စားလှယ်များအားလုံး ကျန်းမာချမ်းသာကြ၍ မင်္ဂလာအပေါင်းနှင့်ပြည့်စုံကြပါစေကြောင်း နှုတ်ခွန်း ဆက်သလိုက်ပါတယ်။ ဒီနေ့စတင်ကျင်းပတဲ့ ဆဋ္ဌမပုံမှန်အစည်းအဝေးကာလအတွင်းမှာ ၂၀၁၇-၂၀၁၈ ဘဏ္ဍာရေးနှစ်အတွက် ပြည်ထောင်စုအဆင့်အဖွဲ့အစည်းများ၏ ဖြည့်စွက်ခွင့်ပြုငွေစာရင်းနှင့် ပြည်ထောင်စု ၏ နောက်ထပ်ဘဏ္ဍာငွေခွဲဝေသုံးစွဲရေး ဥပဒေကြမ်းတို့ကို ဆုံးဖြတ်အတည်ပြုကြမှာဖြစ်ပါတယ်။ ပြည်သူ့လွှတ်တော်မှာ ဆွေးနွေးဆောင်ရွက်ကြရမယ့်ဥပဒေကြမ်းများကတော့ ၁၇ ခုရှိပါတယ်။ အဆိုများ အနေနဲ့ အသင့်ဖြစ်ပြီးအဆိုကိုးခုရှိပါတယ်။ မေးခွန်းများအနေနဲ့ ပဉ္စမပုံမှန်အစည်းအဝေးမှ ဆဋ္ဌမ ပုံမှန်အစည်းအဝေးသို့ ပြောင်းရွှေ့မေးမြန်းထားတဲ့ ကြယ်ပွင့်ပြမေးခွန်း ၈၅ ခုအပါအဝင် အသင့်ဖြစ် ကြယ်ပွင့်ပြမေးခွန်း ၁၂၉ ခုရှိပါတယ်။

ပြည်သူ့လွှတ်တော်ကိုယ်စားလှယ်များခင်ဗျား-

 ဒီနေ့ကာလဟာ ကျွန်တော်တို့နိုင်ငံသားတွေအားလုံး စည်းလုံးညီညွတ်မှုကို ပြသရမယ့်အချိန်အခါပဲ ဖြစ်ပါ တယ်။ ကျွန်တော်တို့နိုင်ငံရဲ့ အတိတ်သမိုင်းကြောင်းကို ပြန်ကြည့်ရင်လည်း စည်းလုံးမှုပြိုကွဲခဲ့ချိန်တွေမှာ နိုင်ငံဟာ အဘက်ဘက်က ယိုယွင်းပျက်စီးခဲ့တာကို တွေ့ကြရမှာဖြစ်ပါတယ်။ လက်ရှိအချိန်မှာ ကျွန်တော်တို့တိုင်းရင်းသားတွေအကြား၊ ပါတီများအကြား မယုံကြည်မှုနဲ့သံသယတွေကို ဖယ်ရှားပြီး ပြည်ထောင်စုစိတ်ဓာတ်မွေးမြူကြဖို့ တိုက်တွန်းလိုပါတယ်။ နိုင်ငံတော်ရဲ့မည်သည့်နေရာဒေသတွင်မဆို အခက်အခဲ၊ အကျပ်အတည်း ဘေးအန္တရာယ်များနဲ့ ကြုံတွေ့လာပါက ပြည်ထောင်စုကြီးအရေးလို့ ခံယူကြပြီး ပြည်ထောင်စုစိတ်ဓာတ်ဖြင့် ဝိုင်းဝန်းပူးပေါင်းဆောင်ရွက်ကြစေလိုပါတယ်။ ကျွန်တော်တို့ အားလုံး စုစုစည်းစည်း ညီညီညွတ်ညွတ်ရှိနေမှသာ ပြည်တွင်းပြည်ပအန္တရာယ်တွေကို စည်းလုံးညီညွတ်ြ ခင်းအင်အားဖြင့် အတူလက်တွဲကာကွယ်နိုင်ကြမှာ ဖြစ်ပါတယ်။

 

ပြည်သူ့လွှတ်တော် ကိုယ်စားလှယ်များခင်ဗျား-

ကျွန်တော်တို့ ဥပဒေပြုရေးမဏ္ဍိုင်ဖြစ်တဲ့လွှတ်တော်များ ရှင်သန်ရပ်တည် လာခဲ့တာ အခုဆိုရင် ဒုတိယသက်တမ်းရဲ့ ဆဋ္ဌမအကြိမ်ကို ရောက်ရှိလာခဲ့ပြီဖြစ်ပါတယ်။ ခိုင်မာအားကောင်းတဲ့ Legislative Institutions များ အဖြစ်နဲ့ လှုပ်ရှားလည်ပတ်နေပြီးလည်းဖြစ်ပါတယ်။ ဒီလို ဥပဒေပြုရေးတာဝန်တွေ ဆောင်ရွက်တဲ့အခါ Mother of Law ဖြစ်တဲ့ ဖွဲ့စည်းပုံအခြေခံဥပဒေနှင့် ညီညွတ်မှုရှိ/မရှိ သတိပြု ဆောင်ရွက်ကြရမှာဖြစ်ပါတယ်။ ကျွန်တော်တို့လွှတ်တော်က ပြင်ဆင်အတည်ပြုလိုက်တဲ့ ဥပဒေပြဋ္ဌာန်း ချက်တွေဟာ ပြည်သူတွေရဲ့ လူမှုစီးပွားဘဝကို ကာကွယ်မြှင့်တင်နိုင်တဲ့ ဥပဒေတွေဖြစ်ရပါမယ်။ လွှတ်တော်မှာ မေးမြန်းတဲ့မေးခွန်းတွေ၊ တင်သွင်းတဲ့အဆိုတွေဟာလည်း တည်ဆဲဥပဒေ၊ နည်းဥပဒေများ နှင့်အညီ ဆောင်ရွက်ကြရမှာဖြစ်ပါတယ်။ ဒါကြောင့် ကျွန်တော်တို့ဟာ ပြည်သူ့ကိုယ်စားလှယ်များပီသစွာ နိုင်ငံတော်နဲ့ နိုင်ငံသူ/နိုင်ငံသားများရဲ့အကျိုးစီးပွားကို ဆက်လက် ကာကွယ်မြှင့်တင်ဆောင်ရွက်ကြပါစို့လို့ ပြောကြားရင်း နှုတ်ခွန်းဆက်သလိုက်ပါတယ်။ အားလုံးကို ကျေးဇူးတင်ပါတယ်။

၂၀၁၇ ခုနှစ်၊ အာက်တိုဘာလ ၁၇ ရက်