Skip to main content

ဒုတိယအကြိမ် ပြည်သူ့လွှတ်တော် ဆဋ္ဌမပုံမှန်အစည်းအဝေး (၁၆) ရက်မြောက် နေ့တွင် ပြည်သူ့ လွှတ်တော်ဥက္ကဋ္ဌ ပြောကြားသည့် နှုတ်ခွန်းဆက်အမှာစကား

 

ပြည်သူ့လွှတ်တော်ကိုယ်စားလှယ်များခင်ဗျား- ဒုတိယအကြိမ် ပြည်သူ့လွှတ်တော် ဆဋ္ဌမပုံမှန်အစည်းအဝေးဟာ ဒီနေ့ ပြီးဆုံးမှာ ဖြစ်ပါ တယ်။ (၁၇-၁၀-၂၀၁၇) ရက်နေ့က စတင်ကျင်းပခဲ့တဲ့ ဆဋ္ဌမပုံမှန်အစည်းအဝေးဟာ ဒီကနေ့ဆိုရင် (၁၆)ရက်မြောက်ရှိခဲ့ပြီဖြစ်ပါတယ်။ အစည်းအဝေးကာလအတွင်းမှာ ကြယ်ပွင့်ပြမေးခွန်း(၈၈)ခု မေးမြန်းဖြေကြားခြင်း၊ ကြယ်ပွင့်မပြမေးခွန်း(၂၀၈)ခု ဖြေကြားခြင်းများ ဆောင်ရွက်နိုင်ခဲ့ပါတယ်။ အဆို(၈)ခု တင်သွင်းနိုင်ခဲ့ပြီး အတည်ပြုအဆို (၄)ခု၊ မှတ်တမ်းတင်အဆို (၃)ခုနဲ့ ဆက်လက် ဆွေးနွေးရန် ကျန်အဆို (၁)ခုတို့ ဖြစ်ကြပါတယ်။ ဥပဒေကြမ်းများအနေနဲ့ ဆွေးနွေးဆောင်ရွက်ခဲ့တဲ့ ဥပဒေကြမ်း(၂၃) ခု ရှိပြီး ဥပဒေကြမ်း (၇)ခုကို အတည်ပြုနိုင်ခဲ့ပါတယ်။ အတည်ပြုနိုင်ခဲ့တဲ့ ဥပဒေကြမ်းတွေထဲမှာ နိုင်ငံတော်စီးပွားရေး ဖွံ့ဖြိုးတိုးတက်မှုကို တစ်ဖက်တစ်လမ်းက အထောက် အကူပြုနိုင်တဲ့ မြန်မာနိုင်ငံကုမ္ပဏီများ ဥပဒေကြမ်းကို အတည်ပြုနိုင်ခဲ့ခြင်းဟာ ကျွန်တော်တို့ လွှတ်တော်အခန်းကဏ္ဍအတွက် သမိုင်းမှတ်တိုင်တစ်ခုလို့ ဆိုရမှာ ဖြစ်ပါတယ်။ ဆက်လက် ဆောင်ရွက်ရန် ကျန်ဥပဒေကြမ်းများအနေနဲ့ (၁၆)ခု ကျန်ရှိပါတယ်။ ယခု အစည်းအဝေး ကာလ အတွင်းမှာ တပ်မတော်သားပြည်သူ့လွှတ်တော်ကိုယ်စားလှယ် (၈)ဦး အပြောင်းအလဲ ရှိပါတယ်။ ၎င်းတို့ကို ကတိသစ္စာပြုခြင်း၊ လွှတ်တော်အခွင့်အရေးကော်မတီနဲ့ အစိုးရ၏ အာမခံချက်များ၊ ကတိများနှင့် တာဝန်ခံချက်များစိစစ်ရေး ကော်မတီတို့တွင် တပ်မတော်သား ပြည်သူ့လွှတ်တော် ကိုယ်စားလှယ် (၁)ဦးစီကို အစားထိုးဖွဲ့စည်းခြင်း၊ ပို့ဆောင်ရေး၊ ဆက်သွယ်ရေးနှင့် ဆောက်လုပ် ရေးဆိုင်ရာ ကော်မတီနဲ့ ပညာရေးမြှင့်တင်မှုကော်မတီတို့တွင် တပ်မတော်သားပြည်သူ့ လွှတ်တော်ကိုယ်စားလှယ်(၂)ဦးကို လေ့လာသူများအဖြစ် အစားထိုး တာဝန်ပေးအပ်ခြင်းများ ဆောင်ရွက်နိုင်ခဲ့ပါတယ်။ ပြည်သူ့လွှတ်တော် ပုံမှန်အစည်းအဝေးများကို ကိုယ်စားလှယ်များ အားလုံးက ဝိုင်းဝန်းပူးပေါင်း ဆောင်ရွက်ခဲ့ကြတဲ့အတွက် အခုလိုအောင်မြင်စွာ ကျင်းပနိုင်ခဲ့ကြ တာကို ဥက္ကဋ္ဌအနေနဲ့ မှတ်တမ်းတင် ဂုဏ်ပြုအပ်ပါတယ်။ ပြည်သူ့လွှတ်တော်ကိုယ်စားလှယ်များခင်ဗျား- ဒီမိုကရေစီ အသွင်ကူးပြောင်းရေးကာလတွင် ဥပဒေပြုရေးမဏ္ဍိုင်၏ အခန်းကဏ္ဍဟာ လွန်စွာအရေးကြီးပါတယ်။ ကျွန်တော်တို့ ဥပဒေပြုရေးလုပ်ငန်းစဉ်များဟာ ဒီမိုကရေစီ စံချိန်စံညွှန်း များနှင့်အညီ ကျင့်သုံး ဆောင်ရွက်ကြရမှာ ဖြစ်ပါတယ်။ နိုင်ငံတော်မှာ လောကပါလတရားများ ထွန်းကားဖို့အတွက် တရားဥပဒေတွေ အခိုင်အမာ ပြဋ္ဌာန်းနိုင်ကြဖို့ လိုအပ်ပါတယ်။ ဒီမိုကရေစီရဲ့ အသက်သွေးကြောဖြစ်တဲ့ လွှတ်တော်လုပ်ငန်းစဉ်များ မှန်ကန်စွာ လည်ပတ်နိုင်ဖို့နဲ့ အပြန်အလှန် ထိန်းညှိနိုင်ဖို့အတွက် ကျွန်တော်တို့ ကိုယ်စားလှယ်များရဲ့ စွမ်းဆောင်ရည်ရှိမှုအပေါ်မှာ မူတည် နေပါတယ်။ ကျွန်တော်တို့ဟာ ပြည်သူတွေကို ကိုယ်စားပြုပြီး ဒီမိုကရေစီနှင့် လူ့အခွင့်အရေးများ ထွန်းကားအောင် ဆောင်ရွက်ခွင့် ရရှိနေကြတာဖြစ်ပါတယ်။ ဒါ့ကြောင့် အစည်းအဝေး ရပ်နား ထားစဉ် ကာလအတွင်းမှာလည်း လွှတ်တော်အတွေ့အကြုံ ရှင်းလင်းပေးခြင်း၊ ဆောင်ရွက်သင့်၊ ဆောင်ရွက်ထိုက်တဲ့ ပြည်သူကို ဗဟိုပြုတဲ့၊ ပြည်သူကို အကျိုးပြုတဲ့ ဒေသဖွံ့ဖြိုးရေးနဲ့ လယ်ယာမြေ နှင့် အခြားမြေများ ပြန်လည်စိစစ်ရေးစတဲ့ လုပ်ငန်းတာဝန်တွေကို လွှတ်တော် ကိုယ်စားလှယ်များ အနေနဲ့ ဦးစားပေးဆောင်ရွက်ကြဖို့ တိုက်တွန်းမှာကြားလိုပါတယ်။ ပြည်သူ့လွှတ်တော်ကိုယ်စားလှယ်များခင်ဗျား- နိဂုံးချုပ်အနေနဲ့ မှာကြားလိုတာကတော့ မဲဆန္ဒရှင် ပြည်သူလူထုထံ ပြန်လည်ရောက်ရှိ တဲ့အခါမှာ ပြည်သူကြားကို ထဲထဲဝင်ဝင် သွားရောက်ပြီး ပြည်သူ့အသံနဲ့ ပြည်သူ့ဆန္ဒ၊ ပြည်သူ့ သဘောထားတွေကို အလေးအနက်ထား မှတ်သားနားထောင်ကြပါ။ ပြည်သူလူထုက အားကိုး ယုံကြည်ရတဲ့ လွှတ်တော်ကိုယ်စားလှယ်များ ဖြစ်အောင် ကြိုးပမ်းဆောင်ရွက်ပေးကြပါ။ ပြည်သူ့ ဆန္ဒ သဘောထားတွေကို အကောင်အထည်ဖော်နိုင်အောင် စိတ်ကောင်း စေတနာမှန်ဖြင့် ကြိုးစား ဆောင်ရွက်ပေးကြပါ။ ရပ်ရွာအေးချမ်းသာယာရေး၊ တရားဥပဒေစိုးမိုးရေး၊ အမျိုးသား ရင်ကြားစေ့ ရေး၊ ပြည်တွင်းငြိမ်းချမ်းရေးပျက်ပြားစေတဲ့ အန္တရာယ်များကိုလည်း မျက်ခြေမပြတ် သတိချပ်ကြ ပါ။ ဒီမိုကရေစီအသွင်ကူးပြောင်းရေး၊ ဒီမိုကရေစီ ဖက်ဒရယ်ပြည်ထောင်စုနိုင်ငံတော် တည်ဆောက်ရေးအတွက် အနှောက်အယှက်အဟန့်အတားများကိုလည်း ကာကွယ်ပေးကြပါ။ လွှတ်တော်ကိုယ်စားလှယ်များဟာ ဥပဒေပြုရေးမဏ္ဍိုင်ရဲ့ Identity များ ဖြစ်တဲ့အတွက် ဆင်ခြင်တုံ တရား လက်ကိုင်ထားပြီး ပြောဆို၊ ဆက်ဆံဆောင်ရွက်ကြပါလို့ အသိပေးနှိုးဆော်လိုပါတယ်။ “ ကိုယ်စားလှယ်များ အားလုံး သွားလမ်းသာလို့ လာလမ်းဖြောင့်ကြပါစေ။ မိမိတို့ လိုရာခရီးကို အန္တရာယ်ကင်း ဘေးရှင်းစွာနဲ့ ချောချောမောမော ပြန်လည်ရောက်ရှိကြပါစေ။ နောင်ကျင်းပမယ့် ပြည်သူ့လွှတ်တော် သတ္တမပုံမှန် အစည်းအဝေးမှာလည်း ကျန်းမာ ရွှင်လန်းစွာနဲ့ ပြန်လည် ဆုံစည်း နိုင်ကြပါစေ” လို့ ဆုတောင်းရင်း နိဂုံးချုပ်အပ်ပါတယ်ခင်ဗျား။ အားလုံးကို ကျေးဇူးတင်ပါတယ်။

၂၀၁၇ ခုနှစ်၊ နိုဝင်ဘာလ ၂၃ ရက်။